Jun 21, 2023 | 15:52 Konfranslar, iclaslar
AMEA-nın Fəlsəfə və Sosiologiya İnstitutu, Bolqarıstan Elmlər Akademiyasının Fəlsəfə və Sosiologiya İnstitutu, Türkiyə Atatürk Universiteti və UNESCO üzrə Azərbaycan Milli Komissiyasının “Mədəniyyət, şüur və ailədə gender problemləri” mövzusunda birgə beynəlxalq seminarı keçirilib.
Seminarda Fəlsəfə və Sosiologiya İnstitutunun baş direktoru, f.e.d., professor İlham Məmmədzadə giriş nitqi ilə çıxış edib. Professor çıxışında ailənin bir institut kimi müxtəlif cəmiyyətlərdə mühüm yer tutduğunu, lakin tədqiqat obyekti kimi çox mürəkkəb olduğunu, yeni yanaşmaların vacibliyini və ölkəmizdə sosial sahədə dövlət siyasətinin prioritet istiqamətlərindən birini məhz ailə siyasətinin əsasını təşkil etdiyini vurğulayıb.
İlham Məmmədzadə bildirib ki, həm vətəndaşların ailədə bərabərlik dəyərlərinə dair fikirlərini müqayisə etmək üçün sosial şəbəkələrin təhlilini, həm də ailədə bərabərlik anlayışları üzrə ekspert sorğusunun keçirilməsini özündə əks etdirən gender tədqiqatların metodologiyasına, ailə problemlərinin həllində maarifçiliyə xüsusi rol verilib.
Öz çıxışında Azərbaycan Respublikasının UNESCO üzrə Milli Komissiyasının nümayəndəsi Emil Əhmədov seminar iştirakçılarını salamlayaraq tədbirin təşkilinə görə təşkilatçılara minnətdarlığını bildirib və Azərbaycan Respublikasının UNESCO üzrə Milli Komissiyasının bu istiqamətdə gördüyü işlər barədə ətraflı məlumat verib.
E.Əhmədov seminarın bütün iştirakçılar üçün faydalı olacağını və ekspertlərin iştirakı ilə səmərəli müzakirələr aparılacağını və bu layihədə iştirak edən təşkilatlar arasında sıx əməkdaşlıq əlaqələrinin qurulmasına zəmin yaradacağını bildirib.
Atatürk Universitetinin İqtisadiyyat Departamentinin müdiri, professor Kərəm Karabulut “Ailənin gender bərabərliyində təhsilin rolu”, Ailə, Qadın və Uşaq problemləri üzrə Dövlət Komitəsinin mütəxəssisi Aytəkin Hacıyeva “Azərbaycanda mövcud vəziyyət: problemlər, perspektivlər”, Bolqarıstan Elmlər Akademiyasının Fəlsəfə və Sosiologiya İnstitutunun direktor müavini, professor Bogdana Todorova “Müasir gender tədqiqatlarında ailənin sosioloji problemləri”, AMEA-nın Fəlsəfə və Sosiologiya İnstitutunun Müasir fəlsəfənin problemləri şöbəsinin aparıcı elmi işçisi, f.ü.f.d., dosent Zeynəddin Şabanov “Cəmiyyət gender mədəniyyəti müstəvisində”, Bolqarıstan Elmlər Akademiyasının Fəlsəfə və Sosiologiya İnstitutunun direktor müavini dosent Albena Nakova “Ailədə gender problemlərində dinin rolu”, AMEA-nın Fəlsəfə və Sosiologiya İnstitutunun Azərbaycan fəlsəfə tarixi şöbəsinin aparıcı elmi işçisi, f.ü.f.d, dosent Faiq Ələkbərli “Azərbaycan türk düşüncəsində ailə fəlsəfəsi: tarix və çağdaşlıq”, Fəlsəfə və Sosiologiya İnstitutunun şöbə müdiri, siyasi elmlər üzrə fəlsəfə doktoru, dosent Günel Məlikli “İlham Əliyevin siyasi strategiyasında gender siyasəti və milli-mənəvi dəyərlər”, Samirə Dadaşova “Ailədə gender bərabərliyi vasitəsilə ədalətli və inklüziv cəmiyyətin təşviqi”, Fəlsəfə və Sosiologiya İnstitutunun elmi katibi, f.ü.f.d., dosent Sevinc Həsənova “Gender problemlərinin etik aspektləri”, Fəlsəfə və Sosiologiya İnstitutunun Beynəlxalq əlaqələr şöbəsinin müdiri, f.ü.f.d., dosent Zöhrə Əliyeva “Azərbaycan maarifçiliyi fəlsəfəsində gender bərabərliyi məsələləri”, Fəlsəfə və Sosiologiya İnstitutunun Heydər Əliyevin siyasi irsi və azərbaycançılıq şöbəsinin kiçik elmi işçisi Ceyran Hüseynli “Ənənə və emansipasiya (Azərbaycan qadını nümunəsində)” mövzularında çıxış ediblər.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.
